مبروك لمتحرشين العالم جسم بنتنا و هو بتتعرى فى ارض الشارع على ايد ولاد
بلدها ... وألف مبروك للاعلام العالمى مادة دسمة يتكلموا عنها لسنين ادام
... ومليون مبروك على اسم "الجندى المصرى" اللى بيتورط فى تقارير اعلامية
تحت صورة للاسف مش فوتوشوب كما يدعى البعض ، صورة بتوضح اغتصاب بنت على ايد
أب يعنى مش مغتصب عادى .
وحشية !! هو ده كان وصف جرنال "الصن" البريطانى على صورة الجندى اللى
بيضرب بنتنا ، وعمل الجرنال تقرير طويل عريض تحت الصورة اللى كتبوا عليها
التعليق ده " و حشية .. جندى الجيش المصرى بيستعد لركل امرأة" و ابرز ما جه
فى التقرير ان الجنود المصريين اتعودوا على التعامل بوحشية مع النساء اللى
بيتقبض عليهم فى التحرير !! و جرنال "نيويورك تايمز" الامريكى نشر الصورة
اللى قال ان مشهد تمزيق الجنود لملابس ست محجبة و هى فاقدة الوعى مؤشر خطير
هيدخل مصر فى دوامة من العنف .... جرنال "صنداى ميرور" البريطانى فكه من
كلمة الجندى المصرى و قالك "الجيش المصرى بيحط جزمته على المتظاهرات" ...
حتى قناة "روسيا اليوم" نشرت الفيديو على موقعها تحت عنوان "فظاعة ظهور
البنت ذات حاملات الصدر الزرقاء ، اظهرت الشرطة العسكرية المصرية بصورة
اكتر وحشية " ....
كانت القوات بتجر الستات من شعرهم على الرصيف و بيضربوا النشطاء لحد ما
يبقوا جسس ، الجيش المصرى استخدم العنف بصورة دراماتيكية يوم السبت و ماكنش
بيهمهم الكاميرات ، ده كان كلام جرنال الاميركى "واشنطن تايمز" اللى قال
ان الاخوان والسلفيين كانوا مركزين على فرز الاصوات فى المرحلة التانية فى
الانتخابات ..... و مجلة أتلانتك الامريكية أكدوا فى تقريرهم عن الصورة ان
مفيش مبرر ممكن يتصدق حوالين اللى عملته الست او طريقة تعامل جنود الجيش
معاها .
اما الاعلام الإسرائيلى فحدث ولا حرج عمل الواجب وزيادة ، تحت عنوان
"الصورة اللى زلزلت اركان مصر"، قال موقع مركازى الاخبارى العبرى ، ان
زلزال فى مصر والعالم حصل اول امبارح ، بعد الفيديو اللى اترفع على موقع
اليوتيوب ، وبتظهر فيه قوات الامن المصرى و هى بتضرب المتظاهرين المصريين ،
وقالوا ان الجنود المصريين بيضربوا المصريين فى كل انحاء الجسم بدون تمييز
، و تحت عنوان " امام الكاميرات .. جنود مصريون يعتدون على الفتيات
والنساء" قالوا ان قوات الامن سحبت قميص بنت اثناء ضربها لدرجة ان حمالة
صدرها بانت ، الجميل بقى ان التلفزيون الاسرائيلى عرض فيديوهات البنات وهما
بيتسحلوا و بيتقلع حجابهم على ايد الامن المصرى ، ده غير الفيديو المعروف
اللى علقوا عليه و قالوا ان الفيديو ده اثار العالم و عمل عاصفة عالمية ،
وظهرت بنت بملابسها الداخلية فى الوقت اللى كان فيه الجنود بيعتدوا عليها
بالضرب بمنتهى القسوة والوحشية....
قسوة ووحشية هما دول الكلمتين اللى انتشروا على التلفزيون الاسرائيلى
تعليقاً على جنود مصريين ، يعنى جه اليوم اللى يطلع فيه فيديو من مصر يعمل
عاصفة احتجاجات عالمية ، و الناس اللى اخترعوا الكلام ده اصلاً ايام
الانتفاضة الفلسطينية يضموا صوتهم لصوت العالم بوصف جنود مصر بالهمجية ،
وعرض فيديوهات كان نفسى تطلع فوتوشوب للمصريين و هما بيتسحلوا و بيضربوا و
بيتقلع هدومهم ، و لا عزاء لشرفاء اكتوبر.
كتابة / سمر العباسى
المصدر / او فن
